My blog

Label... Category... Standard Entry Video Information Press Release Event News

• some random B&W pictures

  Wednesday, Nov 4, 2009 12:27PM / Standard Entry

  
  
  

  5 comments–  Add a comment

• 一切從隻嘢開始《三》

  Thursday, Oct 29, 2009 2:17AM / Standard Entry

  一切從隻嘢開始《三》

  上機無耐疴兩次嘔一次啪多劑藥隨即瞓著的好友多得嗰張“曉”震兼且可以攤直嚟瞓嘅飛機凳令我倆得到九個鐘頭嘅休息。哈利路亞！

  抵埗墨爾本後立即要求接待人員買碗白粥給好友充飢。接待人員稱在墨爾本很難找到有水準的白粥啊！苦苦思量十分鐘又手機上網又打電話左問右問後卒之問到一間據稱係全墨爾本最有水準的粥品店。結果最有水準白粥在墨爾本唐人街嘅定義係：重味精加好大碗…句號！

  還有四小時就正式演出，好朋友求其推晒碗重味白粥啪多劑藥之後再次進入夢鄉爭取一分一秒時間休息希望盡量以“最佳”狀態示人。而我則留守於房間內以防她再有什麼特發事情降臨。

  多得互聯網絡嘅發達由當時只限於軍用發展至今日近乎全民皆用才得以令我輕鬆打發了四小時嘅光陰。

  我問過好多人都話如果無咗電腦同internet一日，成個人都會function唔到！我雖未至於此地埗但無電腦一日肯定慘烈 過朝早起身喺屋企嘆完杯齋啡後搞肚。你將肛門先收得肉緊就係為咗摷番噚晚唔記得擺咗喺邊嗰包烟，幾番廳房來回之後更要單挑人體極限試圖再把肛門收窄至針都 吉唔入嘅狀態然後飛奔衝入厠所一屁股坐下，毒素﹑毒氣一併以下…呼！之後你絲絲然將香烟放於口中，轉身，提手，將放於厠所窗台的火機拿穩，轉身，回頭，再 提手，然後，咔嚓…咔嚓…咔咔嚓嚓咔嚓咔咔嚓嚓…無晒GA屎！你咬著口煙手揸一個撻咗半個世紀都撻唔著嘅火機……！睇到呢到如果你覺得好臭呀嘅話：

  (一)証明我啲文字功力升咗呢！

  (二)你隔離有人放屁甚至失禁！

  (三)你正在如厠途中並細讀緊小弟之劣文。

  所以我要喺度贈你一句極爛之GAG以示對自己嘅鼓勵- 正所謂：有烟無火，惨過赤裸！哈哈哈哈…

  

  一大抽無厘啦耕後返番正題喇！好朋友經四小時休息後身體及精神狀態已回復五六成，到達表演現場看見近千人迫爆現身支持，好友如有神座臨塲發揮出應有水準表現尊業又唱又跳，我和搞手們看在眼裡聽進耳內無不感到欣慰，再感謝主！

  

  願主保佑所有在地上行走的都暢通無阻，要火有火。

  註：你地係咪覺得我呢篇好離題呢？真係應驗咗《風行東京》杜如風小姐所言：你開頭第一次睇到自己篇文出街一定好開心好興奮係咪？寫到第五篇而又諗唔到再寫啲乜之後你就會問自己：做乜要咁攞苦嚟辛呢！哈哈…爛命倫妳好嘢！哈哈哈哈…

  
  

  3 comments–  Add a comment

• 如何令自己活得更痛苦第7集之再再再再再再再攞苦嚟辛!

  Monday, Oct 26, 2009 9:51AM / Standard Entry

  
  Video: http://www.youtube.com/watch?v=o7Muijr1q7Y
  

  
  
  
  

  2 comments–  Add a comment

• 一切從隻嘢開始《二》

  Friday, Oct 23, 2009 11:23AM / Standard Entry

  一切從隻嘢開始《二》

  啪完一大堆消炎止痛止暈止疴止嘔止瀉退燒葯三小時後，好朋友用死雞撐飯蓋之腳力加上我一雙豪邁香雞臂勉強將近附虛脫的她由睡房半托半“咩”落準備在上機前拎去維修之錢七。

  放低架錢七喺表面雙熟其實次次都俾佢斬到成頸血嘅車房後，立即飛的直驅機塲。當的士駛至龍翔道我先發現今次走埠做show最重要之揾食“架生”…手提電腦，唱針，黑膠，竟然漏咗喺屋企無拎！

  我：司機大佬麻煩你“dov”我返屋企先吖唔該，我低咗啲好緊要嘅嘢呀唔好意思！

  好彩由返歸拎番個DJ BAG到去機場途中，好朋友都在大堆藥力影響之下全程“O聯”座熟睡於的士內，否則我肯定會被插至體無完膚(笑)！

  好喇，經過由如電影情節一般的有驚有無險橋段後卒之抵達機場。連“BUN”帶跑推著兩大件行李加病人乙名，快速CHECK IN後我向地勤服務員要求輪椅一張給好友而被拒!

  佢嘅解釋係：你朋友身體表面並無傷殘而機場輪椅服務只提供給有需要之人仕如身體有缺陷或行動不便之長者，所以未能為先生你提供服務。唔該晒呀真係！

  你好嘢呀你，見我朋友痛到面目扭曲至近乎變形你竟然都可以無動於忡！但我朋友更好嘢，她將撐飯蓋用剩之腳骨力從行李車站起並以箭步直bun往海關counter咁我當然二仔底死跟啦！

  候機室內朋友嘅身體狀態依然相當相當虛弱，還不時附上痛楚呻吟… 坐喺佢隔離唯一可以做嘅除咗安撫外就係幫佢影幾張相留念做個記錄(日本紀實攝影家荒木經唯教嘅。所謂攝影，就是拍下自己以後想再看到的和不拍自己和被攝者不喜歡的)。

  上機前再跟澳洲那邊報告情況：我地上咗機喇，一切照原定計劃進行！九個鐘頭之後墨爾本見。

  註：如各位讀者們不幸有差唔多嘅事情發生喺你身上而要喺機場借張輪椅嘅話，用“punk”帶將是但一隻腳包到隻糉咁應該work！但當然希望你地個個都身體健康唔駛用到呢招啦(笑)！

  願主保佑所有在地上行走的都身心健康。

  

  
  
  
  

  7 comments–  Add a comment

• 一切從隻嘢開始

  Tuesday, Oct 13, 2009 4:40AM / Standard Entry

  一切從隻嘢開始

  
  究竟呢隻嘢去過邊度呢？坑㮡垃圾堆屎塔邊…肯定！
  
  輕描淡寫千山萬水南征北討長途拔洩爬上我地碟蒜蓉炒白菜仔我頂你個肺你隻嘢吖！我知你有你嘅工作但我都有我嘅忙碌嘛。我寧願你攪我都咪攪我好朋友吖，佢聽晚仲要飛澳洲打碟㗎。話晒人地都係第一次衝出亞洲去到一街都係講英文嘅墨爾本同悉尼表演呢!
  你梗係爽啦一毫子都唔駛就“分享”咗我地碟$58蚊嘅蒜蓉炒白菜仔然後過枱... 但我地同間餐廳都無邀請你㗎！你有無諗過我地感受㗎？
  
  我朋友為咗呢次演出準備咗成個月日日上網撈歌排RUNDOWN練習。我由幫佢搭路﹑安排﹑聯絡﹑越洋長途電話﹑EMAIL足足半年就係為咗呢個澳洲之旅。你連招呼都唔打聲就“欄”上我地碟菜…...
  
  你果然好毒！只用清蜓點水式之三腳貓功夫就可以在兩個時晨內令我朋友受你劇毒之影響而為我們送上了一個:
  
  <食物中毒腸胃炎連兩位無覺好瞓套餐>
  
  頭盤兩度- 頭暈身興發燒襯胃部鼓脹腸狀抽促。
  主菜- 嘔吐大作十番後以黃膽水伴碟配疴到九彩至虛脫暈倒。
  甜品- 我出盡九牛二虎之奶力以香雞双臂將好朋友從浴室抱落被臭飛畫到花晒嘅錢七再以平均時速 100 km飛車落觀塘廿四小時營業診所硬打消炎針一支加五日抗生素﹑止暈止疴止嘔止瀉止痛退燒葯一大堆。

  
  
  一個食物中毒腸胃炎連兩位無覺好瞓套餐總值……
  
  蒜蓉炒白菜仔$58
  
  咖哩雞飯連凍飲$68
  
  牛肉餡餅兩件$20
  
  醫藥費$ 380
  
  油錢當我豪俾佢！
  
  簽晒合同而因私人理由未能成行之澳洲循徊表演賠償費在這不便透露但信譽盡“位”兼以後都唔駛旨意再有人揾你兩個出埠做嘢之損失肯定無價！
  
  唔理三七廿一求其執定兩個人兩星期要用之行李再算！
  
  距離上機時間還有六個小時。
  
  註：隻嘢並唔係小強。
  
  

  6 comments–  Add a comment

209

1/42

1

2

3

4

5

6

7

8

9

10

>

>|