Bjork-The Volta Tour in Hong Kong

copyright 2008 @ http://tube.hk

Bjork-The Volta Tour in Hong Kong嘅相，已經刊登喺 Tube.hk，大家可以Click入去。

好耐冇睇過一場咁尖叫嘅Live，為我哋開年打頭陣嘅Bjork Tour，由開頭好似白蓮教出巡嘅一枝樂手出場，氣勢可謂近年大班band都冇佢咁堅揍嘅陣容，呢一下已經令我覺得無論A zone，B zone都著數晒嘅live！

玩咗大約45分鐘，佢未氣咳，我都已經跳到痴晒線，由Army Of Me開始我已經收唔到制，又見前面兩兄弟都開始除衫放袋，我哋呢群熱血細胞終於由蠢蠢欲動至發狂，踩到臨尾Pluto同Wanderlust，直頭叫到聲沙，跳到唔知自己係到跳咩動作嘅地步，總之就係癲Q咗，當您企係後面，睇晒D lighting折射反射，左閃右避嘅燈光真同埋嗰條仲high過您嘅Dj，您真係冇咩好做，真係攞晒觀眾嘅歡呼同尖叫聲，高興上嚟放盡喉嚨尖叫，放盡肢體狂跳！

最開心係本人最期待嘅Bachelorette同All Is Full Of Love都有玩，後者雖然甩甩地，但我照受，因為個氣氛真係好攞命，腦裡面不禁浮起好多當時聽呢首歌嘅片段，而Bjork真係中氣十足，抵佢由夾band到依家都一直得到所有人喜愛，當然仲有佢獨特嘅意念，無論係正正常常一套感人電影Dancer in the dark到玩到盡服裝、髮形、化妝...都令人口水多過茶，呢劑真係有啲睇完有開心過後嘅失落感。

我好期待下次同亞V，亞C再睇show，加埋我呢個陣容一定係一個「癲」字，無計，始終係候生仔，唔多唔少行為上係痴線D。