今日年三十晚，係10年嚟第一次冇HK Rap Up，的確，冇之前咁多壓力，我仲買咗隻game諗住今晚慢慢煲。

回想起過去10年嘅農曆新年都要趕製Rap Up的歲月，難免有啲感慨，班兄弟陪我癲足10年嘅情景我仍然歷歷在目，仲有坐係電腦前嘅你哋，每一年都大力支持，真係無言感激。

可能幾年之後已經冇人再記得呢個系列，但係呢10年嘅經歷我係唔會忘記嘅，喺度同大家講一聲豬年快樂，祝大家心想事成，身體健康！

p.s. 新專輯已經趕製中，雖然冇咗Rap Up但唔等於我會停下來，另外，新一年，工作上也會有唔同嘅新嘗試，請大家繼續密切留意同支持我！