細佬做主持?!

今個禮拜一三五為新城節目粵港潮做嘉賓主持﹐仲會邀請圈中好友比我訪問添!起初一接到喱個 job就覺得成件事真係不可思議!!!「口才了得」嘅我連被訪問都驚到口窒窒﹐今次仲要去訪問人添﹐仲唔緊張到甩牙骹咩?!終於驚咗咁耐﹐喱一日終於都嚟到喇!驚都無用﹐唯有比 D心機 prepare一下﹐set定 D問題準備訪問啦!第一日請到我EP監製蔡一智﹐真係超感激阿智﹐因為佢真係唔單只兩協插刀去幫我﹐仲要幫人幫到底!入到直播室嘅氣氛好熱鬧﹐因為除咗有我同阿智之外﹐仲有露芙同陳禮賢喱兩個正牌節目主持﹐再加埋身處廣州嘅主持彭偉添!大家開咪就真係好似傾計咁﹐所以總算唔係太緊張!又發覺其實佢哋幾位好錫住我喱個新人﹐見我唔識插嘴又會丟問題比我講。訪問嘅內容亦都令我受寵若驚﹐因為談論我同阿智嘅合作時﹐阿智讚我嘅聲線好有潛力﹐話我令佢諗起少年陳百強﹐仲話我嘅歌路可以發展到Eason咁闊添!得到阿智喱番鼓勵真係好開心﹐但唔多唔少都會有些少壓力﹐因為別人對我有期望﹐我自己就要做好 D﹐唔可以辜負阿智同辜負大家!不過﹐阿智都好體貼﹐都叮囑我千其唔好比自己太大壓力﹐既然中意做喱行﹐做音樂﹐就應該抱住" play music"玩音樂嘅心態﹐出嚟嘅作品先會好!係 !收到!總括今次嘅表現嚟講﹐作為一個被訪問者﹐我覺得表現都算 OK﹐不過作為一個嘉賓主持﹐我真係仍需努力喇!希望跟住落嚟會有好D嘅表現啦!就喺度同大家預告一下啦!今個禮拜三會請到型男師奶殺手馬德鐘﹐而禮拜五就會有氣質優雅美女洪欣。嘩 !咁強勁嘅陣容﹐你點可以唔聽呀?!記住禮拜三同五晚七至八﹐扭開收音機聽新城電台節目粵港潮喇 !!!