TVB排舞記

今日經歷咗入行以嚟其中一個最大最大嘅挑戰同打擊!事關去咗TVB為禮拜六晚舉行嘅翡翠歌星賀台慶排舞!面對住咁多「舞林高手」﹐我諗我係唯一一個無跳舞底子嘅artiste喇!

D舞步對於我嚟講真係唔係咁簡單﹐排舞進度又快﹐再加上我好驚拖累大家﹐所以壓力真係好大!雖然我盡咗最大嘅努力﹐不停記﹐不停練﹐但係始終一日之內要吸收咁多舞步真係too much﹐有 D吃不消﹐跳到抽筋嘅feel!唯有咬緊牙關﹐有幾多記幾多!但好彩有咁多位dancer老師同跳舞勁嘅artistes師兄師姐睇住﹐佢哋又好好人﹐唔嫌棄我跳得差﹐仲主動教路添!非常之感激佢哋!雖然真係好大打擊﹐但係有機會學一樣我從未接觸過嘅事﹐仲有機會喺台慶喱個大show表演﹐其實我覺得好幸運同感恩!今次仲燒起咗我想學跳舞喱團火添﹐要挑戰自己唔得嘅嘢﹐學到得為止 ! [To-do list再加一項﹕學跳舞!]再加上可以同咁大班artiste一齊﹐足足跳足六個半鐘﹐一齊去 accomplish一樣嘢﹐感覺真係好興奮﹐好爽呀!!!!!!!距離台慶仲有幾日﹐我哋亦淨返兩次practice﹐ [救命 !真係太少喇!!]希望我可以將勤補拙﹐趕得上進度啦!大家到時記得留意我哋嘅演出呀!!!