發放正能量

無論係順境定逆境﹐人人都需要正能量。所以﹐我好想成為一個正能量小子!希望從今以後所寫嘅blog都能夠帶到正能量比大家啦!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~你琴晚有無參與地球一小時熄燈行動﹐做個環保小先鋒呢﹖我就有呢!都幾搞笑﹐因為為咗可以響應喱個運動﹐我同家人早 D出街食飯﹐然後專登預時間夾到啱啱好八點半返到屋企!本來都想望出去﹐睇下睇唔睇到星星﹐可惜個夜空唔夠清﹐而始終都唔係家家戶戶都有響應。不過唔緊要﹐可以再多 D時間靜靜地同屋企人一齊過就已經好正。再者﹐盡管今次唔係所有人都響應﹐但畢竟環保都唔係一次性嘅活動﹐所以希望喱個活動可以喚起更多人繼續於日常生活都想盡辦法去救救地球啦!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~好興奮﹐因為仲有幾日﹐草蜢忘我演唱會就開鑼喇!!!真係超期待的!知道阿智﹐傑仔同阿細一定勤於彩排當中﹐所以今日下晝就去咗佢哋練舞嘅studio探班。果然﹐佢哋真係開衡turbo﹐亦練得如火如荼 (邊個讀如火如「茶」真係要打pat pat!)淨係見佢哋練習就已經咁精彩﹐相信到時 on show一定會 high爆全場!講真﹐真係不得不佩服佢哋﹐比著係我﹐不停咁載歌載舞幾個鐘真係唔得(咁我又唔係主打跳舞路線嘅!)不過我相信假以時日我都可以有料踏上紅館喱個舞台!

(而家距離喱日確實係有 D遠﹐不過比 D時間我一步一步向目標邁進啦!)除此之外﹐今日嘅探班都見到另一樣令我有感而發嘅事…見到除咗草蜢三子之外﹐仲有一大班落力綵排嘅dancers。佢哋真係好賣力﹐好搏命練﹐仲比我聽到其中一位女 dancer練到甩咗骹。不過見佢仍然好似無事咁繼續排練﹐我睇得出佢係個好 tough嘅人﹐好欣賞佢。睇得出其實任何一個團體裡面﹐每一個人都好緊要﹐就算預到咩困難都要頂硬上!身處於喱一行﹐甚至係喱個社會﹐我哋又何嘗唔係一個群體嘅一份子﹖我見到嘅就係﹐想整體好﹐自己就要做好本份﹐大家亦要互相鼓勵互相扶持。自己個人唔夠料咩﹖咪用 double努力﹐將勤補拙囉。自己認為自己好掂咩﹖過份個人主義都會拖垮整體嘅合作﹐不如諗下點樣去用多出嘅精神幫助有需要嘅人啦!你話一個互助互利嘅群體係幾咁美好呢﹖

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~你 …今日嘅正能量指數又有幾多呀﹖