唔知幾時開始，香港人好興話自己好毒，咩「我好毒咖，成日打機！」「我好鍾意龍珠咖！毒唔毒？」「我冇女咖！係毒男一個！」人人都爭住認自己毒，不論男女，有個「毒」字跟身就好似有光環咁，我呸！係我面前，跟本所有人都唔夠我咁毒。點解？咁我問你喇，你咁毒，試過一個人食放題未？

有日，我突然好想食放題，想狂啪三文魚刺生，但身邊冇人冇物，所以決定一個人都要去食放題。

放題，好明顯係為咗一大班人而設，俾你一路食嘢，一路同朋友吹水，我懷疑放題跟本冇預過有「一位」呢個設定，除咗有幾間聽到我話「一位」唔俾我入之外，你留意吓，平時旺角兆萬中心門口派放題傳單嘅哥哥姊姊，見到你一個人行的話，多數都唔會派俾你，甚至你行埋去想攞張傳單，佢都唔理你，嗰陣我先發現，原來一個人毒，連被介紹嘅權利都冇，Sell你都費事呀！

「易拉西而媽西，先生幾位？」，當我向個侍應講「一位」時，佢個反應明顯係應對唔到，招呼其他人佢好爽手，「兩位呢邊，九位埋邊！」但對住我，佢靜咗幾秒，「一位呀.....呀......一位呢度吖......」，面對住「一位」，老手都變初哥。

當我坐底時，其實四圍D人都唔會話特別理我，雖然我一個人坐喺度，但其他人只會當我等緊朋友，所以繼續高談闊論，大聲講大聲笑。隔左陣個侍應問我駛唔駛收走對面套餐具，我話好，呢個時候，我隔離台班人突然靜哂，佢地應該估唔到我居然真係一個人食放題，「喂！你睇佢真係一位。」「好慘呀！」香港人就係咁，成日以為自己好細聲，其實大聲到咁嘈嘅環境我都聽到呀！

叫完第一輪嘢食，我先發現出事，我忘記咗，放題如果要飲嘢，係要出去攞，所以我只好孭埋個背囊出去攞嘢飲，D人見到我行過好似見到個痴線佬咁，有條女仲話：「哇，乜走個陣都可以攞野飲咖？攞番屋企飲咩！」我冇出聲，靜靜咁返埋位坐，但坐底之後我冇除個背囊，我孭住食，直到食完。

到呢到，你應該好好奇我呢餐食咗幾多嘢，會唔會好蝕？我食咗三輪，每輪都叫咗大約五款嘢，出咗去攞幾次嘢飲同雪糕。至於抵唔抵，我好老實講，放題其實係呃人，跟本七成係食個氣氛，三成係食物質素。當你成班人一齊食放題嘅時候，一味掛住傾計，你跟本唔知自己食緊D咩落口，屎都會照食，望都唔會望。但當我一個人食嘅時候，我終於可以認真咁試吓D嘢食，原來，食餐飯嘅氣氛真係好影響個味道，呢餐放題D嘢真係好普通，又俾Open rice呃咗。

食完，我坐咗喺度望吓其他食客，有D係情侶一雙一對，有D一大班朋友傾緊將來畢業有咩發展，有D係舊同學聚會，係咁叫個侍應姐姐幫手影相，成間嘢，就得我係一個坐喺度。原來一個人食放題最難唔係唔知點開口講「一位」，唔係俾人白眼，唔係要孭埋個背囊出去攞嘢飲，而係你見到咁多人咁開心，而自己得一個。個一刻你先感受到真正嘅「毒」係咩。

你身邊有冇人用「毒」嚟自居仲好自豪？有嘅話，問吓佢有冇試過一個人食放題，冇嘅叫佢試吓，試完佢應該以後唔敢話自己毒，信我，「毒」跟本唔值得自豪。

**餐放題我冇影相，一個人食飯都要影相未免太可憐，所以，以上講嘅嘢信不信由你。