成班人毛啦啦狂推一碌嘢叫「唱K神器」，姐係一碌會自己播音樂，有內置Effect嘅藍芽無線咪。

先唔講佢係大陸出品可能會爆炸，淨係講個概念都有問題，其實成件事，你用部電話播音樂已經做到，你可能會話：「喂點同呀，支嘢有Effect！」，醒下啦，跟本你唱歌係好聽，清唱都已經可以，你估有Effect之後會令你唱得好聽咗，即刻有公司簽你出碟，俾你去紅館開演唱會唱人地D歌咩？

之後一定有人話買支嘢都係幾舊水，夠你唱足一世，反而俾錢去唱K，只係唱得個一陣，買支嘢唱化算好多啦！嗱，我自己就好少去唱K，不過仲記得成班人去唱K，大家爭咪、插歌、唔知點解，唱親《活著VIVA》都會High哂、係咁叫D有曖昧嘅男女唱合唱歌、失戀就點哂D失戀歌唱到喊，仲有好多好多嘢，係一間黑媽媽嘅K房，有好多唔同嘅回憶。反觀呢支所謂唱K神器，除咗買嚟拍片呃吓Like，我真係唔知仲有咩用。幾舊水買隻妖怪手錶唔好？我就唔信你會一條友坐係屋企攞支咪獨唱。

香港樂壇沒落，愈來愈少人唱K，當日喺K房點首《友情歲月》一齊唱，稱兄道弟嗰班，而家見到面都只係講句：「得閒出嚟飲嘢啦。」

其實，買碌垃圾咪呃Like，不如約埋班好耐冇見嘅朋友去New Way唱好K，爭吓咪，發吓癲，大笑一場好過。

**支咪個樣仲要好核突，貴嗰支成支採訪咪咁，做記者定唱歌呀？

**咩錄音、評分功能都係多餘，跟本一部電話攪得掂，最白痴係其實支咪都係要連電話。