Announcement
- Dun Stop Da Muzik
My blog
-
週記 08-09
Sunday, Nov 22, 2009 11:42PM / Standard Entry
星期日：
一連三個FUNCTION，首先就梗係有我嗰個《動漫電玩遊樂園》啦，SETTLE DOWN晒之後就嗱嗱林趕過去沙田帝都酒店去「百分百感覺劉雲傑分享會」，今次除咗有劉雲之外，重有扈佳榮、可嵐同埋李蘊。今次唔係我做MC，我純出席啫。
之後就又趕頭趕命去荷李活中心個由韓國觀光公社搞嘅《韓國冬日狂歡節》，今次特別嘉賓係為HOTCHA，重有唻自韓國嘅亂打CREW同埋靚女滑雪教練，最抵死就係有第一屆韓國IMAGE GRIL選舉。如果想睇返呢個SHOW嘅精華就記得上我Youtube同Facebook睇喇。
星期一~四：
呢幾日只係做咗幾樣嘢，就係食飯瞓覺去廁所剪片同埋去西九做《Dragon Music Alive》，今個星期嘉賓有赤子嘅呀YO同呀博、A DAY同埋KellyJackie4個單位！而之後嘅《Dragon Music Alive》就係?11月嘅23-26號，表演嘉賓就有J.O.Y.、85UP2、PINK同埋Girliciouss Asia，今次我重失驚無神咁會走上台同佢哋JAM吓歌！到時記得下晝5點半準時西九龍中心一樓大堂見喇！
星期五：
等?大半年，終於等到我偶像之一Roland Emmerich?大作2012上喇！作為FANZ嘅我點會唔第一時間睇吖，我去咗油尖旺好多間戲院買飛都FULL晒，最後就卒之晌尖沙咀華懋搵到兩張黐埋牆嘅位，難得有少少時間，就梗係咩位只要唔係背住銀幕就咩位都肯睇?。雖然Roland嘅戲來來去去都係嗰幾種FORMULA，但每次淨睇特技都睇到我眼坦坦！唔覺唔覺又兩個幾鐘，唔知我幾時先寫到呢啲咁嘅劇本而又有人肯投資俾我拍呢？
星期六、日：
又到一星期一次晌西九搞嘅《動漫電玩遊樂園》FUNCTION嘅日子喇！今次一氣呵成搞足兩個SHOW！就係《動漫電玩遊樂園》嘅KICK OFF SHOW同埋同ANIMAX合辦?《ANIMAX角色扮演大賽》，而嘉賓方面我哋就搵咗十個專業COSPLAYER、唻自日本嘅MODEL歌手SUGAHO同埋09女新人羽翹AVA、重有YO-HK嘅大當家CORIA，再加上COSPLAY達人HENRY出席，兼做埋評判添！又係嗰句啦，想聽返睇返當日SHOW就記得CLICK入UONLIVE.COM同埋YO-HK.COM聽返睇返啦！
星期一：
由我Zoho D.I.Y. Muzik Factory、中青基業、陽光網絡及E-Sport合辦，Yo-HK.com同埋Uonlive.com協辦嘅第一屆《Miss IEF 2009》選舉，將喺11月28日晌西九龍中心《動漫電玩遊樂園》入面進行決賽！十位入選Miss IEF候選人已經選晒出唻，大家可以CLICK入http://missief.esports.hk網上投票同先睹為快啦！
星期二：
啱啱呢頭先至話今年十月先係近幾十年最熱嘅十月，一個禮拜唔夠嗰頭十一月就係近22年最凍嘅十一月，係咪黐線架！睇返唔單止香港，成個中國，甚至全世界嘅氣候都反晒常！華北雪災、華南旱災、華東水災，英國又水災、南極又有冰山甩咗落唻飄向紐西蘭、又周圍都地震，真係唔知幾時香港會陸沉呢，其實我覺得而家先講環保已經無用，因前人積落個鑊真係好大，即管睇吓12月個全球氣候會議啲大國傾成點啦！
星期三：
一定要支持！我兩位老友最新派台歌！長洲村姑水滴AVA羽翹嘅「吸血新世紀」同埋許樂洪傑扈佳榮嘅「我對我」，記住捧場聽晒呀！
星期四：
今日應呀劉雲傑邀請，我同KJ KellyJackie去咗佢老友新開嘅紅酒窖試酒，呢隻酒係西班牙牌子，好唔好飲就真係唔知，因為係人都知我係滴酒不沾，點都唔明點解劉雲會搵我去試酒嘅，哈哈！但係唔講試酒，我就對佢嗰隻鬼佬金華火腿勁有興趣！嗰隻西班牙煙燻豬脾，聽佢哋講值成幾千蚊架！我一個人幾乎食咗佢三分一，好味到呢！重有佢嗰隻高檔鵝肝醬，完全唔覺得羶，重有啲啲甜添，愛唻搽麵包一流！雖然我無飲酒，但就聽佢哋講咗好多紅酒同白酒嘅知識，都學到唔少嘢架！
星期五：
香港人喺冬天十居其九都係打甂爐當食飯架啦，我今日忽發奇想，3條友喺屋企打甂爐，最正嘅就係我契女喺佢男友檔家族海鮮舖揀咗啲超撚手又新鮮又好味嘅海鮮拼盤唻，有魚啦、蝦啦、蟹啦、迷你象拔蚌啦、聖子啦、花甲啦咁，我最鍾意就係海鮮火鍋，啲肥牛同啲丸呀咁真係行埋一二角！好難得居然有一餐甂爐會甂到清晒，最後連湯都唔放過！飲埋！用海鮮打甂爐直頭係人生呀！
星期六：
又一個星期，今次西九龍中心嘅《動漫電玩遊樂園》係《Cosplay動漫歌曲歌唱大賽》，身兼嘉賓兼評判嘅就係日本樂隊Girliciouss Asia同埋COSPLAY達人HENRY！問過Girliciouss Asia佢哋，啲參賽者嘅日文正唔正宗，佢哋都話正到不得了，認真估唔到！
夜晚去咗睇鄧紙皮GEM嘅九展嘅第一次個人演唱會，「18 LIVE」，無嘢講，歌精舞勁唱得陣得，點夠佢頂呀！送俾大家兩張保證全港獨家?GEM演唱會嘅相啦！
-
週記06-07
Monday, Nov 9, 2009 4:51AM / Standard Entry
星期日：由我Zoho同文化傳信合作嘅《百分百感覺》廣播劇終於大結局咗喇！不過我一早話咗會有兩個結局嘅，點解要有兩個結局？因為好多讀者or聽眾都想許樂會同唔同嘅女主角發展，為咗照顧唔同聽眾嘅口味，我就特登錄定兩個結局，重大事咁喺西九龍中心搞埋呢個我最期待的結局發佈會，實行全球首播呢個隱藏結局！唔知你哋係咪聽晒兩個結局呢？而你哋又鍾意邊個結局呢？
星期一：每個星期都唔知點解實有一日係做通頂嘅，今個星期都唔例外，我尋晚又無得瞓，可以叫有嘅，如果個半鍾都叫瞓嘅話…好彩重後生，頂得住，不過驚遲啲老咗啲後遺症出晒唻嗰陣唔知點算好咯！
星期二：繼02年我整咗個dreadlocks頭之後，我一直都對黑人頭念念不忘，所以襯有半日時間，就去咗老友J先生度搞搞呢個辮仔頭！老友J話應該可以keep到一個月！睇吓呢個月有邊位老友有幸可以「親眼」見到我呢個頭吖！最後真係要多謝老友J先生辛苦用咗6個鐘眼都花晒咁幫我紮呢個頭喇！Thz Bro！
星期三：今日係今個月last日去西九搞呢個Dragon Music Alive，今日個嘉賓係英皇娛樂台嘅Pink陳聞平！下個月又繼續會有我哋同大家唱唱歌，下個月會係9-12號，23-26號同埋30號，記得捧場呀！
星期四：今日第一日去韓國水原拍IEF國際數字娛樂嘉年華，呢個一年一度由中國同韓國政府合作嘅數字娛樂節日，集打機比賽、機械人世界杯、唱歌比賽、跳侐比賽呀咁，令世界各地嘅年青人有一個大顯身手嘅平台，呢個festival認真值得撐呀！我今次就跟住香港CS冠軍隊地拍晒成個嘉年華，到照舊啦，聲音喺uonlive播影像喺yo-hk播，等我返唻剪好俾條link你哋睇啦！
星期五：唻咗兩日，今日憬IEF嘅開幕典禮，唔親眼睇過真係唔知，估唔到中韓政府咁撐電子年青嘅玩意！我諗除咗韓國總統李明博之外，好多韓國嘅高級官員都有出席呢個開幕典禮，就好似首爾市市長，京畿道省長呀咁，內地都派咗唔少高級官員出席，都咪話唔誇張！重有表演嘉賓重有風靡成個亞洲10-40歲男性嘅韓國人氣組合「少女時代」，香港亦都有代表，就係我老友Niki周麗琪！如果香港政府都咁撐電玩文化就好咯！
星期六：今日卒之都開始比賽！嘩！grand到吖！成個嘉年華佔成幾個會場，唔同場玩唔同比賽，香港隊喺云云咁多多國家嘅選手中得第六！最後只係緊輸俾亞軍嘅中國隊16比14，實在係有晒交待啦！最後我哋就拉大隊吔正宗韓燒慰勞吓佢哋啦！
星期日：今日閉幕禮，因下晝五點先開始，但我哋住水原，去首爾快極都要一個鐘，只可以揀一個地方去，咁我上晝就帶佢哋去明洞行吓啦，佢哋班友仔去到明洞好似放監咁，又買又食！因只可以去一個地方，我就決定犧牲我自己無去梨泰院買我最愛嘅hip hop嘢，等佢哋咴呢個全韓國最in嘅地方玩返夠本啦！
星期一：終於都走喇，因我哋搭超早機，我怕班友唔知醒miss咗班機，我決定忍心一次，迫佢哋喺水原行通宵唔准瞓！後尾我哋就行吓又入吓seven，又行吓，又入吓漢堡包店，又吹吓水咁，行到朝早6點半先返酒店準備走！返到酒店睇天氣報告先知原來出面嘅氣溫係零下2度，唔怪之得好似好凍咁啦！哈！點知落機返到香港，居然係27度！半日之內正負30度，都咪話唔搞笑！
星期二：返到香港，全日周圍拜訪，睇返上星期我唔晌香港西九嘅show搞成點。都唔錯，反應好好！夾公仔達人皇者挑戰賽，皇者俾人挑機成功！果然江山自有才人出，一代新人勝舊人！想聽返同睇返成個比賽過程就上返yo-hk睇同上uonlive.com揀ACG Live節目聽返啦！
星期三：因去咗韓國，今日一路入片一路1My TVB.COM煲返宮心計同富貴門，重有美女廚房！好彩有兩部電腦，一部做嘢一部睇劇集！正！
星期四：去韓國5日total拍咗十餅帶九個幾鐘片同影咗3000幾張相！估唔到我要用一日時間執相同upload返啲相上facebook！重added咗好多韓國識嘅唔同地方嘅朋友，之後互tag相！我覺得facebook同msn令到世界再無任何彊界！人人只要上網，友誼就自己會繼續keep in touch！勁！想睇吓我啲相就有時間click入去http://picasaweb.google.com.tw/home睇吓啦！
星期五：老友Colleen可嵐生日喎！我點會唔捧場呀！快啲出多啲歌，賺多啲呀buddy！
星期六：今日又到西九我嘅《動漫電玩遊樂園》嘅show day，今日係《Cosplay舞蹈大賽》，重搵到Gloria黃榕做嘉賓兼評判！估唔到cosplay跳舞係咁好睇！記住下星期去西九龍中心睇埋Animax角色扮演大賽呀！
-
周記04
Monday, Oct 19, 2009 4:50PM / Standard Entry
星期日：一連睇咗六場歐洲區2010年南非世界杯外圍賽，睇到眼都定埋，最hapi就係我隊愛隊意大利成功贏得小組首名直接出線資格，係人都知我十幾廿年意大利同AC米蘭die hard fanz，AC米蘭都重好，早幾年贏過唔少大賽，但近兩年一直食白果，加上今年踢到咁，真係修人笑死呀！意大利都唔好得去邊，06年叫做贏到世界杯，但喺香港唻講，意大利波始終俾人話悶，但我作為一個後防球員，意大利啲防守意識真係要學吓架。西班牙啲後防一味曉帶波進攻死扭爛扭，英格蘭啲後防就一味高Q大腳解圍，而意大利啲後防就會hold波在腳，慢慢組織進攻，唔得就交返後再做，我就係鍾意呢種組織踢法喇！大家下次睇波留意吓吖，悶係悶啲，但真係好好睇架！
星期一：由今日開始，我Zoho同西九龍中心合作第一炮《Dragon Music Aliva》終於開show！呢個星期total有四場mini live，星期一有本地Hip Hop組合85up2同佢哋嘅嘉賓生蕃，星期三就係女歌手張苡澂Venus同佢個嘉賓Tam，星期三就係前赤子樂隊嘅呀Yo同呀Bob，星期四就係KellyJackie陳曉琪，每晚由七點半至八點三！唻緊重有二十號嘅newage組合J.O.Y.、廿八號英皇新秀海選票王Pink陳聞平，最後廿九號就係A Day，有興趣嘅老友記得捧場喇！
星期二：大件事！本來今日要交HKIEF條片俾人，點知做做吓部電腦死咗，用盡方法都救唔返，最後就要嗱嗱林衝出旺角買過一套頂住檔！最後諗吓諗吓，決定一不做二不休！買過套堅啲嘅，咁就唔駛半年壞一次咁大劑！最後就買咗塊華碩新底板、新嘅2.8GHz CPU、4GB Ram、750W火牛、Buffalo 1.5TB外置harddisk同埋Buffalo外置DVDR，加加埋埋差唔多成六千蚊！買完之後即刻裝機，再搞埋條片！最後朝早七點半搞掂晒！十點準時交片俾人！跟住一路做嘢直踩，數吓數吓，唔計搭車瞌一瞌，我由星期二朝九點至星期四凌晨四點，我叫做直踩四十三個鐘！
星期三：今日交完片經過銅鑼灣HMV，順便入去睇睇有啲咩新嘢，睇咗一陣，突然俾兩隻唔係新出品嘅DVD吸引住！第一隻就係Matrix 4碟裝，3集電影加埋動畫版，雙DVD入面有4套戲，重要係美版靚聲靚畫無壓縮添，點解？因為呢個DVD嘅格式係雙面Duel Layer，簡單唻講即係有兩面，而每面有兩層，所以先可以放咁多data落去，而隻DVD亦比普通DVD厚同重，揸上手就知架喇！跟住另一伎就係地心探險記2D+3D版，講到明3D版，佢重好好咁隨碟送4副3D眼鏡，咁一家四口睇都唔駛爭眼鏡吖！美中不足就係副眼鏡唔得似戲院啲咁新款，佢重係用返十年前嘅左紅右藍鏡。而呢隻DVD亦都係雙面Duel Layer，一面係2D Version，另一面就係3D Version，重有一樣真係講都無人信，就係兩隻DVD加埋280蚊有找，你係咪話好抵睇吖！
星期四：今日喺西九做完嘢去咗睇我班frenz踢波，我同呢班波夾咗應該over十幾年，真係由細踢到大，佢哋今日就係比賽，直到舊年我都係其中一員，但今年因好多時都要返電台，或者開工拍嘢呀咁，今季就少咗披甲上陣…不過都重有同佢哋逢星期六朝夾吓波嘅。真係好話唔好聽，我除咗波友之外，我近年真係幾乎斷六親，如果每星期唔再踢吓波，我諗我一定做咗自閉仔！
星期五：今日做完嘢食完飯嗱嗱林趕返屋企，點解？就係返去睇我偶像松哥套《蔡鍔與小鳳仙》大結局。呢套劇雖然跟唔足晒史實，劇情又有少少犯駁，但淨睇松哥同海味啲演技都可以話係值回票價啦！講真，我未睇呢套劇之前，我直頭唔知邊個叫蔡鍔，我為咗易啲投入劇情，我用咗一晚摷晒蔡鍔同小鳳仙，又或者袁世凱啲料。真係唔講知，真正嘅蔡鍔死嗰陣先得嗰34歲。而唔係好似松哥咁大年紀。不過如果唔係松哥做，套戲又回會咁好睇呢？
星期六：uonlive動漫時段又改時間喇！由下星期開始，我嗰九個節目就縮到七個，其中《動漫薦場》、《Game On Live》同埋《動漫珍品展》將合做一個新節目《AGS Zhow》，其他都唔會變，但有啲就改咗時間！各位老友記得繼續捧場呀！
-
週記03
Monday, Oct 12, 2009 12:26PM / Standard Entry
星期日：今日全日都拍school.net嘅教育電視，個教育電視唔係我哋細個睇開嗰啲ETV，係專俾一啲家長睇嘅幼兒教學。教啲家長點樣教佢哋嘅細蚊仔，每次都有兩三個小演員，都係3-9歲左右，不過今次有一個係最細嘅，啱啱六個月大，以前拍電視劇嗰陣曾經拍過一個幾個月大嘅BB，嗰個BB喊到吖！兩個鐘都唔收聲，我哋上至導演，下至場記、機器組都搞佢唔掂！唯一就係呀媽抱先唔喊，但唔得架嘛，最後搞到要換BB先拍到。但今次個BB無喊不特止，重好好表情同曉笑添，就係咁，我哋就唔駛遲收工，話咁快就拍晒喇！
星期一：又印新卡片，呢張卡片經我屈指一算，由我第一份工開始計起，已經係第二十款卡片，真係講都無人信！今次呢張特登印埋uonlive同埋我公司facebook group落去，等啲客知我多啲嘛！一路都無同人講過，我呢張卡片個grafitti係我自家出品架！重有我公司logo都係，重要係用人手畫完再scan落photoshop執色，靚唔靚就真係見仁見智喇，但實情都幾old school吓架！
星期二：今晚去咗睇華納嘅《極度冰慌》首影，套戲講咩就喺呢度唔講住，要講嘅就係呢套戲令我知道原來喺南極打風嗰陣行出室外，好似搭棚師傅咁用條安全帶箍住唻行，如果唔係就隨時畀啲over 100公里嘅烈風吹走，都咪話唔危險！都係嗰句，想知套戲拍成點，記得今個星期六留意uonlive.com我同KellyJackie主持嘅《知戲館》喇！
星期三：呢頭先話啱啱感冒好返，嗰頭又個肚唔舒服，痾咗兩日！痴線咩！年頭睇流年已經話我今年好病，但真係勢估唔到病得咁密，由年初五開始又痾又嘔，之後又試過成個星期失聲，之後又發燒又感冒又咳，呢度整損手，嗰度整損腳，真係應有盡有！老實講，我以前不嬲叫鐵人，一年唔會病多過兩次，重兩次都係不藥而癒嗰隻添，但而家…人老就係咁架喇！死啦，我會唔會就死架？送幅八月十五嘅八星伴月大家睇睇啦！
星期四：近排突然鐘意咗食呢隻朱古力，原因有三個，一係我係朱古力迷，幾乎日日都要食過朱古力先安心嘅，二係我對薄荷亦有一種無得形容嘅喜愛，三呢就係呢個牌子嘅朱古力我由細食到大，再加上呢排勁睇佢嗰個戚眉戚眼TVC，咁咪一星期狂食兩排！唔知係咪因為咁食到個肚唔多妥，到今日重未好返，三日喇…
星期五：今日去咗老友Lydia Ding屋企開嘅舖頭grand opening，佢呢間倗頭個名叫《優質食品專門店》，我就咁睇個名，除咗覺得佢係賣同食有關嘅嘢之外，基本上我完全估唔到佢係賣咩嘅，今日咁啱去開嗰頭做嘢，又未夠鐘返電台，就好稀罕咁蒲一蒲頭。其實識我嘅人都知我向來好少出席呢啲喜慶場合，我個frenz見到我出現，佢都忍唔住講：「稀客喎！估唔到你真係會唻！」哈，邊有咁易估到我吖！講返間舖，間舖賣啲嘢九成係我最鐘意食嘅嘢！有唔同產地嘅三文魚啦、火腿啦、香腸呀咁！正！佢話佢哋係直接批發，一定平通街！最衰我唔食生蠔，如果唔係都幾hapi，因為佢成個櫃都係賣生蠔，各位行開大埔東昌街真係唔買都入去昅昅喇！
星期六：經過由上星期六到今星期六七日內我踢咗四日波之後，我發覺我右腳膝頭嘅舊患再痛返之餘，左腳腳踭又新添咗新傷！本來聽晚同後晚都有波踢，但為咗可以繼續延長足球生命，我唯有忍吓唔踢啦！不過話時話，我踢波踢得最密係舊年六月，三十日裡面總共踢咗16場波！離晒譜！重有早幾年又試過連續兩年一星期踢四場波，重密過職業球員！就係咁，我兩隻腳啲傷患真係多到不得了，但為咗hapi同keep fit無計啦！
-
當週記咁打
Tuesday, Sep 29, 2009 2:49PM / Standard Entry
星期一：因為遲啲會周圍拍嘢周身唔得閒，所以決定一次過錄定9個節目total 21集做定存貨，等我就算唔喺香港都唔駛等啲聽眾聽空氣吖！想聽嘅老友記得得閒無事click入去uonlive.com聽呀！特別推介逢星期一同五夜晚七點半去 http://hk.uonlive.com/hk2 直播2台《集體回憶》節目度聽《百分百感覺》廣播劇呀！除此之外，我Zoho遲啲重會同yo-hk唻一個crossover，開一個新節目添，想知係咩？記得個個禮拜昅實我Zoho嘅blog呀！
星期二：我記得上一次日光日白遊海洋公園已經係我小學六年級嗰陣，大大話話都成幾十年，嗰陣莫講話「安安佳佳」，就連跳樓機呀、過山車呀嗰啲機動遊戲都未有！我最記得就係搭吊車，因為我哋成班死仔喺入面掛住吔雞翼而唔記得兩頭望，諗返都覺得蝕呀！今次有時間去重唔搏老命玩返夠本影返夠本咩！有獎遊戲：你哋知唔知呢隻係安安、佳佳、盈盈定係樂樂呢？我真係分唔出！知嘅呢就將答案寫喺身份證後面寄返去你自己屋企，抽中嘅朋友就會得我嘅祝福一次！重係一日一次架！重唔嗱嗱林寄？
星期三：今日去咗幫yo-hk拍嘢，一直以唻都係佢哋幫我拍嘢多，今次就幫佢哋拍返一次，互相幫助嘛。不過個show個名真係識睇識串但就一定唔識點讀，呢個show名就係「Schwarzkopf」，成晚都無聽日噏過個名，我睇怕真係無人曉讀掛！當晚係星級髮型師Chris幫佢班星級嘉賓即場用客戶品牌整頭髮，而呢兩位星級嘉賓就係劉心悠同埋藤麗明喇！除此之外重有好多短靚女model行catwalk！
星期四：真係唔病唔知朋友多，今朝起身突然咳到呌唔到氣，周身骨痛，以為就咁瓜咗老襯，嚇得我吖。醒咗即刻走去睇醫生，好彩，唔係H1N1，只係普通流感，醫生話係唔夠休息先咁，但醫生開藥嗰陣我同佢講要啲唔會眼瞓嘅藥，因我重要開工。你話喇，因為唔夠休息先感冒，但一路無得休息，週而復始惡性循環，你話點會好吖。隨住年紀越唻越大，今年比平時病多咗好多，唔知會唔會老人痴呆呢？不過好似第一句話齋，唔病唔知朋友多，我喺facebook post咗話我病，截至夜晚，我total收咗廿幾個留言，幾個電話問候同幾個sms留言，魚來我Zoho重有朋友架！如果你哋想知你喺你朋友心目中嘅地位，不妨試吓呢招吖。
星期五：今晚去咗睇《林敏聰好歌‧好友演唱會2009》，除咗林敏聰真係我細細個就聽佢啲詞同埋我真係鍾意佢之外，我主打係捧我班老友場，好似可嵐、A Day、莫鎮賢、胡琳、Takki同埋寶瑜。準時8點開場，唱到11點8，3個幾鐘，真係抵到不得了啦！尤其係我哋呢啲細細個就聽歌嗰啲，每首歌都係讀書時期陪住我行行企企、食飯幾味嘅！唯一美中不足就係聽唔到呀聽唱「自妳去後」囉！呢首係ma fava唻架！唯有拎返隻CD出唻聽啦！
星期六：病住咁開工！去咗拍一個game show，呢個game show好勁架！叫「IEF國際數字娛樂嘉年華」香港區選拔賽初賽，我Zoho D.I.Y. Muzik Factory係大會指定拍攝，而yo-hk.com同uonlive.com係大會指定媒體，今次大賽total有over26隊參加，冠軍嗰隊重會代表香港去到韓國水原市參加國際賽添！記住留意yo-hk.com同uonlive.com，我哋會分幾星期同大家貼身報導成件事架！
Stats
- 音樂、文字及影像跨媒體創作人。2000年入行，一直從事幕後創作及製作工作，曾參與不少電影、電視劇、音樂、歌曲、電台、小說等不同媒體之工作...
- Gender: Male
- Total visits: 52,759
