又一週

星期日：繼續病住咁去開工！去拍「IEF國際數字娛樂嘉年華」香港區選拔賽決賽，今次就真係選出邊一隊可以代表香港去到韓國水原市參加國際賽架！由16強一路拍到冠軍爭霸戰，就係睇住呢班小朋友長驅直進咁打敗咁多隊捱冠軍，呢班初生之犢就係叫「RS」，我重會喺十月尾同佢哋一齊去韓國水原架！記住留意yo-hk.com同uonlive.com，我哋會分幾星期同大家貼身報導成件事架！

星期一：感冒初癒，我習慣食完西藥治標之後就食中藥治本，再加上入片電腦做唔到其他嘢，叫做半休息吓咁啦。因之前幾日拍嘢拍到無瞓咁滯，希望雙管齊下做返個健康ZOHO啦！

星期二：今日難得有少少時間，去咗旺角信和行吓。信和我一個月點都要去返兩三次先安樂，每次都去睇吓有咩新CD、新DVD同新公仔書出吖嘛！我幾乎每次都一定有嘢買返屋企嘅，今次嘅入荷品就有我最鍾意嘅Mariah Carey、Hip Hop/RnB嘅Sean Paul、Sean Kingston同埋Maxwell、加上日本韓國嘅青山黛瑪、BigBang同埋G-Dragon，再加多隻DVD 17 again，呢啲就係我今次嘅最新入荷品喇！誠意同大家推介，就係Sean Kingston嘅Tomorrow，真係好好聽架！有時間上去聽吓啦http://www.youtube.com/watch?v=0KnVWKgET6A&feature=related。

星期三：今日開始剪「IEF國際數字娛樂嘉年華」啲片，兩日total拍咗10餅帶8個幾鐘，未剪齋睇片揀shot就已經眼都花，我睇怕淨揀shot就要兩日，剪埋睇怕一個星期啦！都係嗰句，想睇嘅老友記得click去yo-hk.com同uonlive.com分享啦！

星期四：國慶大晒！無錯，國慶真係大晒架！電視節目又讓步，街又封路，又show又煙花又盛！果然祖國甲子大壽一定要做到好好睇睇佢呀！唔知我甲子60大壽有無咁墟冚呢？不過今日真係通街都係人，如果唔係要出去做嘢，我真係唔想出去同人迫呀！留喺屋企睇吓張藝謀今次國慶show又搞咩都好！喺度呼籲吓唔知邊位有錄低夜晚個國慶聯歡呢？我好想睇返呀！

星期五：終於好返晒！聽日開始一連三日有波踢！之前又病又打風又落雨，搞到個幾星期無波踢過，一無波踢人就易病，希望呢幾日踢翻波就健健康康啦。

星期六：一年一度中元節，夜晚做完嘢突然身痕，夜晚約咗幾個frenz走咗去賞月。因不嬲都知每年農歷八月十四至八月十六銅鑼灣大坑都有傳統嘅舞火龍盛會，就成班決定人一世物一世走去湊吓熱鬧兼應吓節咁啦。躡，原來成條220呎嘅火龍插晒香之後嗰種煙眼法十足十好似啲防暴警察狂發催淚彈咁，對眼煙到吖！去過一次見過就夠喇，下次真係咪搞。之後食完飯就順便去埋維園個綵燈會，等到11點37分，即係天文台話成晚月光最高最光最圓嘅時候，岳高頭望兩嘢影幾張相之後就返歸咯！雖然成晚有少少渾吉feel，起碼都叫出唻過吓節吖！係喎，今年好似未食月餅喎…