My blog More entries >
-
肥 . 伴 . 我
Friday, Sep 5, 2008 12:37AM / Members only
我近來終於走去學跳舞, 全班最肥都應該係我. 大家都好似瘦到得番副骨. 不過我位朋友仔竟然話自己要減肥. 對於香港女仔瘦到得番90磅, 都要減肥, 我真係有d納悶. 唔好以為我係妒忌, 雖然我自己都成日話要減肥, 但係其實我又唔覺得自己肥得好難睇. 有時候沖涼嗰陣, 望下塊鏡, 都會覺得自己有幾個角度似希臘古代d美人人像. 有時諗, 如果我生嚮唐代, 我會唔會算係一個標準身形?
我都試過好多種減肥方法, 試過針灸, 食中藥, 節食, 做機, 去纖體中心, 做運動...等等. 試過一個月全職減肥, 用曬以上方法, 一個月減左十磅, 不過一番到澳洲又肥番. 又試過一次, 用左兩種方法, 兩個星期瘦左十磅, 就係失戀 + 大病, 一開心番又肥番.
我諗阻礙我減肥有兩大原因. 一係我太喜歡食野, 一係我根本唔覺得肥有乜野問題. 當然你話肥到影響健康咁就另計. 有時我好小人咁諗, 究竟嗰班瘦人成日話自己肥, 其實係咪想博人講句: 傻啦~你邊度肥? 而佢地聽到後又一定嚮身上係咁用盡力"唧"舊"皮" 同你講:我想減左d舊"肉", 你唔覺我d忽好肥既咩? ......(大佬呀, 點呀.....你想我俾個咩反應呢?) .....我通常會講: 你夠我肥....然後到佢唔知俾個咩反應我好, 因為我真係肥過佢好多, 哈哈!
其實我已經頗習慣自己既身形, 你諗下如果我變左kate moss身形會有幾恐怖呢....所以當時簽左東touch, 然後走佬去澳洲係明智之舉....你睇欣宜做極都做唔到偶像派, 你就知我嚮娛樂圈淨係可以做到小儀個位
-
Photo Album: August 31
Thursday, Sep 4, 2008 11:31PM / Members only
August 31
SNC12151.jpg
SNC12150.JPG
SNC12124.jpg
SNC12280.jpg
SNC12277.jpg
SNC12128.JPG
SNC12201.JPG
SNC12246.jpg
SNC12251.jpg
SNC12260.JPG
-
白象 in 鳥巢
Monday, Aug 25, 2008 2:11PM / Members only
唔想再多講奧運, 因為之前已經講過而且都閉幕, 但係我對北京奧運仍然有以下既疑問:1) 究竟奧運過後北京會否依然美好? 嗱...通常政府都會話: for sure, 但係就正如葉翠翠佢突然咁有$$, 係因為買左中人壽, 你信唔信ar!?2) 究竟北京奧運帶俾中國既形象係正面多定反面多? 睇番今日美國同英國既社評似乎負面多過正面. 咁當然兩國都有d私心, 但係又不無道理.3) 究竟北京奧運帶俾中國一個咩野信息? 係體育精神? 定係運動只為奪標? 你睇無線主持訪問男子十米高台跳水銀牌得主既時候, 淨係叫人"唔好灰心", "只"係得到銀牌, 有咩感想, 而唔係恭喜人地, 就知道究竟金牌對於"大家"有幾重要.4) 如果大家當奧運係一門生意, 咁耗資唔知幾多既億既北京奧運有究竟為中國帶來幾多經濟效益? 會唔會過份地勞民傷財?最後我想講北京奧運可能對於大家嚟講至唔好就係冇得睇家好月圓, 同埋無線整左齣"盛裝舞步愛作戰"嚟嚇鬼lor...
-
你個人樣!
Wednesday, Aug 20, 2008 12:24PM / Members only
唔知邊日睇開新聞話香港人記人名好叻, 係世界排名前幾名, 但係記人樣就非常差. 新聞話係因為香港填鴨式教育所致. 記得細個上堂唔聽書, 我通常會畫公仔, 但係淨係畫人頭, 好多時都係畫自己喜歡既人. 我記番起又真係好似淨係記得人地眼耳口鼻, 就係唔記得人既成個樣係點. 就算身邊親密既人, 都係有咁既情況. 如果你係戴眼鏡既話, 仲大獲...你除左眼鏡之後, 我一定唔記得你係邊個. sorry, 某君...當你瘦左同冇戴眼鏡, 千祈唔好行埋嚟...我一定會問你係邊位...之於係乜野原因導致我記唔到人地個樣, 除左冇記性, 某人存在感低落等等, 我諗最主要係我唔想記.... 道理係同我唔睇愛情片, 愛情小說一樣. 雖然都係鴕鳥式行為, 不過我d隻鴕鳥暫時都保護得自己好好地….所以當每每遇到d好似”once”呀, “P.S I love you”, “cash back” 既物體都會15/16. 究竟睇好定唔睇好呢．．．不過通常嚮我豫疑期間部戲都已經落左畫. 情況同我記人樣差唔多, 好多時嚮我記得眼前人既樣之前，對方已經嚮我心裡面落左畫．星座書話４號出生既人天生冷漠，咁既然係天生，我就無謂逆天而行．呵呵呵呵．．
P.S. 劉先生退出比賽事件，我淨係覺得佢同自己交待到咪得，理鬼得佢乜野“全中國人既希望”，fk that shit! 你落去步呀笨!
-
Oh oooo.. 奧運
Sunday, Aug 10, 2008 4:03AM / Members only
奧運終於開幕. 對於一向鍾意參與多過睇人地做運動既我,本來都冇好大既興趣. 不過今年係中國舉辦點都要8下, 至少都睇下個開幕禮有幾壯觀. 雖然我只係睇重播既精華片段, 都覺得個開幕典禮同預期一樣咁正. 點解係預期中一樣呢? 原因好簡單, 向來暴發戶都係最要面, 點會唔有咁勁就整咁勁? 你聽阿張大導演話下年倫敦都未必追到我地今年既氣勢, 你就知個比賽其實一早已經開始左,仲要唔係嚮運動場上.除左壯觀之外, 我地堂堂大國都要順應國際潮流,講綠色奧運, 但係唔搞咁多野會唔會更環保呢? 唔起嗰個鋼鐵鳥巢,又會唔會多d真正既鳥巢?至於開幕典禮最大買點, 我覺得係嗰二千幾人好機械式好一致既表演, d鬼佬真係一路睇一路嚮到驚, 心諗:如果俾你地十幾億都咁齊心就大鑊咧! d種恐懼感我嚮十年前北京交流行嗰時已經領教過. 嗰陣時接見我地係當時仲係國家副主席既胡錦濤. 夜晚我地有個交流晚會, 即係俾大陸同香港學生表演下咁lor...好彩我阿sir幫我地拒絕左上台表演既機會, 如果唔係實出硬醜. 絕對唔係長他人志氣, 滅自己威風, 只不過d個真係一個事實, 就係內地人對於一d好規律化既事係俾香港人做得好好多. 唔似得香港人成日淨係識走精面.雖然而家自從四川地震同奧運之後, 香港人既愛國心好似強左, 但係嗰種我係香港人, 佢地係大陸人既觀念仍然分得好清楚, 只差在係恐懼定奉承, 可能有d仲認為內地人文化水準唔夠高而仍然輕視人地. 不過我認為中國始終係我既阿媽 我地作為仔女就算阿媽點衰都會想佢改好. 當然阿媽得閒最好都射住我地d仔女.By the way, 究竟有冇人話我知盛裝馬步賽有乜咁好睇?
