My blog

Label... Category... Standard Entry Video Information Press Release Event News

• 我唔係「0靚模」...我係「老模」!!!

  Friday, Nov 20, 2009 11:24AM / Standard Entry

  
  呢期好耐無update過個blog,主要原因唔係我懶....係我太勤力!!!太勤力去做新一輯旅遊節目「風行全世界」嘅後期工作!話晒都叫做第一次自己做節目監制,為咗希望個新節目可以進步過「流行東京」,(我永遠都只會同自己鬥!)我地成隊crew比咗好多好多心機、心血、精神、壓力同時間去並肩作戰,每日只少「困獸鬥」坐埋6個鐘,一齊剪片,希望可以做到最好!!(在此真係要衷心多謝及感激呢幾位軍師!!)....所以...我捱到殘晒瘦晒嘞!!唔緊要,最緊要個節目好睇就得嘞!
  
  Anyways,呢輪真係勁忙,平時喺呢D咁寒冷嘅天氣底下,我一定會「呢」喺張床度冬眠,直至春天回暖先醒!哈!!杜如風呢個不孝女真係轉性啦!我老豆媽咪終於有救啦!!喺最凍嘅日子我竟然日日開工,日抖影相,夜晚就剪片....好似D的士大佬咁,打幾份工嚟養家咁款!勁呀! (係喎,其實我可以揸埋的士添喎!又可以慳返D的士錢,仲有得呃水吹添!有得諗喎!! hahahaha...)
  
  講返影相嘞,最近無啦啦幫Adidas影咗一輯colllection相,成件事都係幾無啦啦地發生嘅...還人情債啩?!其實我自己都一頭霧水....
  
  跟住就無啦啦變咗個「老模」,擺咗一大堆我從來未學過、亦未識擺過嘅pose!!
  
  **希望大家睇完盡量唔好嘔同埋反胃!小心身體為上呀!!!
  
  
  
  
  
  
  
  
  
  
  
  最後呢張最勁啦!簡直係挑戰杜如風呢個「老模」嘅極限呀!!我不嬲都係一個感性嘅人嚟架嘛!!無啦啦又會變咗性感呢???真係一頭霧水..................
  
  
  
  下年書展出書唔洗寫字寫得咁辛苦啦!!! 出本「老模寫真集」得啦! 你地仲要封返封「老毛」比我添喎!! hahahhaaha.....
  
  By the way, I just joined twitter, but I still don't know how to use it! Can anyone teach me?
  my user name is: TOyufungHELEN
  
  
  
  
  

  8 comments–  Add a comment

• 給爸爸的情書...

  Wednesday, Nov 4, 2009 8:45AM / Standard Entry

  
  老爸 :
  
  恭喜你...正式榮休了!!! 每天營營役役忙了一輩子,現在突然要你急停下來,有點不知所措、有點空虛感吧?!不要失落呀,應該好好慶祝一番,是時候輪到你盡情享受人生了!!
  
  從女兒出世前的二十個年頭,為了求生、為了娶媽媽為妻,你已經非常努力地工作;當女兒來到這個快樂世界後,為了讓愛女、讓家庭得到最好的,你更加勤奮地日夜顛倒地為五斗米而折腰,務求令這粒掌上明珠每天維持着「快樂比天高」的狀態。「給我的愛怎會看不到..雖說演你角色實在有難度...」老爸,你對我一直以來默默的無施奉獻、包容、支持及寵壞 ,女兒是完完全全收到的!「唯獨你肯承受我的狂或野!」雖然我還未感到內疚,但我確實地每分每秒都在感恩!!是你的一雙手,讓我變成全宇宙最幸福最快樂的孩子;是你的一雙手,讓媽媽幸福到下一世也要嫁給你。女兒一直也不願嫁,全因為在地球上,我找不到一個比你更好的男人!(最好嗰個,已經被媽咪一早「立」咗嘞!)
  
  老爸,辛苦了你大半生了! 你的任務完成了!光榮地功成身退了!是時侯輪到女兒還債給你,好嗎?!
  
  知道在你心中,我永遠只得三歲, 狂妄任性、享樂成精....知你永久地擔心及過份保護這個三歲的小女孩...但事實上,這名三歲的愛女已經長大不少了!做人處事,略懂一二,事業亦開始有點眉目...請放心讓你的三歲愛女,接棒來當這個家庭之柱吧!試試來一個角色交換,讓我努力出去拼,讓你當一個全宇宙最幸福最快樂的爸爸吧!!!好嗎?
  
  就是你多年來的寵壞,放任地給我四處遊歷、喪玩喪買,誤打誤撞,撞到連「難玩」都可以變成一種可以謀生的職業,沒有你經濟上及精神上的支持,沒有今天的我。
  
  所以如今應該是時候輪到你去四處遊歴、享受人生、慢嚐人間的美麗和快樂。女兒會經濟加精神上全力支持你!!去玩啦,我嘆夠啦!輪到你啦!!!
  
  爸爸,年紀大了...請逐步調整一下你慣了急速的步履,漸漸舒緩下來,享受一下「慢活」的滋味...
  
  賺錢養家方面,女兒未必會做得比你好,但我會盡力去做,亦會盡力減少你對我的憂慮,我會嘗試用我這雙小手,讓你和媽媽得到最好的。
  
  老爸,不用擔心!我永遠撐你,因為你永遠撐我。我永遠愛你,因為你永遠愛我。
  
  
                                                                                                     
                                                                              永遠三歲的掌上明珠,
                                                                                                  如風        敬上
  
  
  PS: 老豆,睇完呢封情信唔好喊!快啲諗吓同媽咪去邊度旅行先啦!我請!!
  
  
  
  
  

  5 comments–  Add a comment

• Happy Halloween 09 之 「神愛世人」!!!

  Sunday, Nov 1, 2009 3:52PM / Standard Entry

  
  一年一度嘅Halloween Party大盛事,如果我乜都唔扮,我會覺得對唔住自己之餘,更加對唔住我一班對我expection 好高嘅兄弟姐妹!!!
  
  於是我喺2個星期前已經做足準備功夫嘞!!我係Unbeatable呢架嘛!!!!當各位女士認為可以藉着Halloween呢個機會盡量穿得少、盡量 show quali 嘅時候,小弟杜如風又點會「隨波俗流」吖!!(原因1.我根本就無quali show!) (原因2.都係嗰句啦:「咁容易被你估到,就唔叫我杜如風啦!! hahhaa...)
  
  好,大家聽我吹水吹咗咁耐.......直接去片啦!!!!!!!!!
  
  
  
  由於Halloween街上太多妖怪,所以我決定今次扮耶穌!主要嘅責任就係充當security,等佢地喺個凡間唔好亂搞事!負責重大架!我諗無乜人敢膽喺Jesus面前搞事掛!!!
  
  
  
  無錯,呢個咁有份量嘅耶穌,個頭淨重3KG!原來耶穌真係好厲利,又唔怕重,又唔怕熱!我就差D煱暈咗! Jesus;你係得嘅!我地呢班星斗市民靠你啦!!!
  
  
  
  爆粗Band友 Krauser II  VS  耶穌  再VS  北極游嚟嘅企鵝!!! 真係mix n mix n mix... but not match!! hahahahahallelujah~~~~~~~~
  
  
  
  查利卓別靈Charlie Chaplin aka 連凱...你技柺杖一陣間可唔可以借比我用吓呀!我一陣仲要去牧羊呀!!! heeheeheee....
  
  
  
  我除在個千斤重嘅頭,裏面都係黐晒鬚架!表裏一致架!...呢D叫做....投入!!! 玩 :我從來都係咁投入架啦!!!  hahaha....
  
  
  
  耶穌耶穌...請接受我呢個好sincere嘅一吻,希望你會原諒我只係同你開吓玩笑,神愛世人吖嘛!!你會寬恕我嗎?你可唔可以遲D帶埋我上天堂玩呀??!! heeheee....
  
  
  
  
  
  吓!仲被我機靈一足,發明咗呢個「BalenciJesus」嘅手袋添!發達啦今次!!!! hahahallelujah!!
  
  
  
  我個好姊妹 Amy 已經急不及待同我ordered咗一個啦!!! 拎住呢個Jesus shoulder bag出街,充滿安全感啦!耶穌實實在在地陪着你行每一步路喎!必定光明幸福見境好啦!!!
  
  
  
  我嘅衣櫃裏的女人BOBO姨,一見到耶穌顯靈現身,興奮到即係實我唔肯放!喂,Bo姐,你今日要食齋架喎!! heeheehee...
  
  
  
  連生連太....好登對喎!!!! What a perfect MATCH!!!!
  
  
  
  仲有成日唔理班 friends 掛住北上發展賺大錢嘅「Yumi Kitty」!!好啦,見你咁勤力,又捱得咁辛苦,又咁誠心祈禱...等 Jesus 賜啲力量比你啦!!! (賺到兩份洗喎!) hahahahhahaha....
  
  
  
  嘩!原因耶穌真係好多好多信徒架!!!我由行入個場都臨走嗰刻,都不停又不停又不停咁被啲陌生人捉住影相!!!!當然神愛世人,我通通都笑口盈盈照單全收!!但其實我係扮架咋....希望佢地知啦!!! Hallelujah~~~~~~~~~~~~~~~!!!
  
  HAPPY HALLOWEEN TO ALL OF YOU GUYS~~~~!!!
  
  
  
  

  13 comments–  Add a comment

• 我的限量版 Travel Diary!

  Friday, Oct 23, 2009 11:43AM / Standard Entry

  
  最近被本港時裝品牌 TiCKET by azona 看中我這個遊行家「無腳嘅鳥仔」的特性,有幸被邀請在全線新店內攪了一個「杜如風旅遊相展 Snap Shot Photo Exhibition」,迎合她們以TRAVEL為主題的全新概念! 仲同我crossover出咗本限量版嘅Travel Diary! 係為咗放便大家去旅行時要mark底好多notes (你知你地架啦!去旅行做定嗰堆功課仲勤力過考試!)所以呢本由TiCKET by azona 同小弟crossover 嘅Travel Diary,就應該對你地呢班成日身痕要去旅行嘅街坊們用嘞!
  
  Diary裏面仲有小弟親筆寫嘅旅行Tips同埋小弟用自己部傻瓜機親自影嘅snap shot! Quality就同 Edwin影嗰d無得比架嘞!但係azona嗰邊提議用生活化d 嘅旅遊snap比較切合個主題, 所以佢地叫我都係用我自己揸機隨手影嗰d 相囉! 失禮哂!失禮哂!!
  
  TiCKET by azona X Helen To - A Sharing Diary of Travel Experiences
  將於10月29日起於銅鑼灣azona a02獨家發售, 先到先得, 售完即止。
  
  售價: 每本$88 (限量發售)
  
  Azona VIP 即日起可優先訂購
  
  查詢:
  azona a02
  2808 0606
  香港銅鑼灣百德新街22-36號名珠城地下
  
  
  
  
  
  
  
  
  
  
  
  
  
  
  
  
  
  仲有好多頁架,不過show住幾頁比你睇先,show多咗我驚比人鬧呀!
  
  準備去旅行嘅你....不妨買返本旁吓身!! 多謝支持!!! heeheehee...
  
  
  
  
  

  4 comments–  Add a comment

• 今個星期六出嚟陪我玩啦!!!

  Thursday, Oct 15, 2009 2:15PM / Standard Entry

  
  今個星期六(10月17日) Esprit尖沙咀旗艦店開張Grand Opening!! 而Esprit好唔好彩地請咗我呢個儍婆杜如風去做佢地呢個Grand Opening嘅主持!!!我睇過份rundown,到時會同大家,包括呢度嘅各位親愛街坊,一齊玩幾個好好玩,仲有獎品攞嘅遊戲添!!!
  
  想見吓我、想同我一齊玩遊戲、或者你根本完全唔識我,淨係想嚟攞獎品、淨係想嚟趁吓熱鬧,或者你淨係想嚟Esprit買衫嘅話(今季d衫都幾靚架!)就記住今個星期六(10月17日)下午1點至6點半,去到Esprit尖沙咀旗艦店逛吓啦!!!
  
  地址:尖沙咀阿士里道口 x 北京道 (舊裕華)
  
  時間: 10月17日 下午1:00 至 6:30
  
  同我玩完之後,仲有得免費睇AT17、林一峰、尹子維同恭碩良and his band嘅演唱添!!!
  
  真係有咁大隻「甲乸」隨街跳喎呢次!!!
  
  大家準時過嚟同我杜如風呢個傻婆玩返餐啦!!!等你呀!不見不散!!!!! hahahaa.....
  
  
  
  
  

  2 comments–  Add a comment

54

1/11

1

2

3

4

5

6

7

8

9

10

>

>|