My blog
-
返來囉!
Wednesday, Aug 12, 2009 5:11AM / Standard Entry
唔好意思﹐一踏入八月份就好似消失咗咁!
大家可以放心﹐細佬無穿無爛﹐
同埋依然好掛住大家!
只不過一係無電腦用﹐
一係就有有嘢做﹐
又或者無嘢做想好好休息下!
無寫新嘢又無覆你哋留言真真唔好意思﹐
而家叫做充返下電﹐
等我又執返起枝筆,
同大家分享一下部份點滴啦!
August 1, 2009 – Wedding
晨早就起身打扮﹐
著得靚仔D準備出門口﹐
因為係我一位喺加拿大已經識嘅朋友娶老婆呀!!!
好開心喺佢哋下午嘅婚禮同晚上嘅婚宴上面可以唱歌祝賀一對新人!
佢哋真係好sweet,
整日婚禮同晚宴安排得好完美﹐
一對新人同所以來賓都好enjoy每一個moment!
由於第二日要超早起身﹐所以就12點都未夠﹐
伊麵同甜品都未食就要走喇!
喺度再次祝福一對新人...
To Christine & Kenny,
It was a well-organized, enjoyable wedding day for the two of you,
but I wish the two of you a blessed marriage with a well-planned future ahead of you!
Always remember as I sang in the song,
"As one in Him you'll grow
and the whole world will know
you are a HOUSEHOLD OF FAITH"
August 2, 2009 – Beijing working day 1
點解前一晚wedding banquet要早走﹖
無錯﹐係因為今朝要超早機飛北京呀!
只係夠時間訓三個幾鐘﹐
四點幾就要起身﹐
六點就要出到機場準備上八點飛機喇!
一到步﹐食完個lunch走隨即上旅遊巴出發到天津喇!
好榮幸有機會喺中國一個企業集團嘅十四週年慶典上面表演﹐
喱個慶典上面仲有成龍大哥同埋大哥藝人公司旗下嘅歌手一同演出!
一路上負責招待我嘅工作人員都勁熱情﹐勁週到﹐
特別係一直跟住我身邊嘅小絮﹐
年紀輕輕嘅一個小姑娘﹐
工作態度卻係如此成熟同體貼﹐
真係值得學習!
另外﹐好開心識到成龍大哥同埋佢嘅一班徒弟仔﹐組合「新七小福」!
大哥雖然貴為一位國際巨星﹐
但係相處短短一個多鐘頭我就可以感覺到佢嘅親和力。
無論係對其他藝人﹐或者好似我咁嘅一個小artiste﹐
甚至對所以工作人員或者三唔識七路過想搵佢影相嘅人﹐
大哥都係帶住親切態度卻不失巨星嘅風范!
而且大哥對待自己嘅表演好認真﹐
一見面嗰一刻其實見到大哥不停背歌詞同開聲﹔
但一有空閒都會不忘使出幽默嘅一面同大家開下玩笑﹐
的確幾鬼馬架!
可能有大哥嘅教導之下﹐新七小福當中嘅幾個大男孩都令我好欣賞!
原來喱個組合嘅組員全部都係習武之人﹐
而且係來自全世界好多唔同地方到中國參加比賽同一連串訓練而篩選出嚟嘅年青人﹐
某程度上有D似棒棒堂﹐
只不過佢哋唔係電視節目打造嘅星﹐
同埋佢哋主要係賣武功(不過佢哋個個舞功都有返咁上下架!)
同七小福相處﹐仲發覺佢哋感情好好﹐
喺大哥不在場嘅時候可以變得好淘氣﹐好鬼馬﹐
甚至會向助手開玩笑﹔
但係做起事上嚟﹐又好自動自覺﹐
同事一聲指示佢哋就絕對聽話同服從﹔
又唔會擺出明星架子﹐
見我一個從香港嚟嘅artiste會主動過嚟同我傾計!
我仲發覺﹐佢哋「一家人」(即成龍大哥同所有旗下嘅artiste同同事)
最令人佩服同藉得學習嘅﹐
就係佢哋永無怕輸泄﹐
自己辛苦一D都無所謂﹐
最緊要係先顧及客人/外人﹐
將好嘢比人先!
當日個show完咗我哋就立即搭個幾兩個鐘頭車返北京﹐
返到酒店都差唔多凌晨兩點﹐
講真全日落嚟咁多個鐘頭舟車勞頓都真係幾辛苦﹐
不過整日嘅美好經歷加上同咁多如此可愛嘅人一齊過﹐
乜辛苦都無晒喇!
同佢哋離別嗰一刻我仲覺得好唔捨得添!
August 3, 2009 – Beijing working day 2
於北京嘅第二日﹐
都係work day!
好在唔洗早起﹐可以訓晏一D﹐
儲足精神下晝為一間超級市場影宣傳照。
個超級市場係位於別墅區嘅一個高級超市﹐
嗰區嘅屋全部都好大好靚﹐
其實有D似我以前喺加拿大生活嘅環境﹐
只不過再靚D豪D!
影完之後﹐超市老闆仲好客氣請我食飯﹐
又帶我去佢開嘅俱落部睇下﹐
叫做體驗一下北京嘅生活咁啦!
喱個北京之旅其實真係令我非常刮目相看﹐
第一次到北京﹐
無諗過原來而家嘅北京都已經變成一個咁先進嘅大城市!
講真﹐我原本可能會有少少成見﹐
不過好快就改觀﹐甚至慢慢中意咗喱個地方添!
August 4 & 5, 2009 – Beijing觀光日s
原定今日夜機返香港﹐
但係突然收到通知﹐
話香港有個颱風迫近﹐
我班機cancel咗!
原本諗住個trip只係嚟三日﹐
得最尾喱一日去玩下﹐睇下北京﹐
可以留多D時間都未嘗唔係一件好事!
卒之就去咗一D有代表性嘅地方﹐
好似南鑼鼓巷﹐王府井小食街﹐
又喺故宮外面兜咗一小個圈﹔
仲去埋08京奧地標鳥巢同水立方!
喱D先係我想象中北京嘅樣貌嘛﹐
有得親臨現場體驗一下真係好正﹐
特別係面對故宮﹐
一個咁多年歷史嘅地方﹐
真係覺得感覺好震撼!
搞笑在一個咁歷史悠久嘅地方﹐
對面街居然會搵到新建﹐超先進嘅酒店同其他建築物﹐
喱個新舊對比又實在太大喇掛﹖﹗
故宮外面蓬牆﹐咁耐歷史點可以唔摸下呢?!
南鑼鼓巷裡面其中一間特色店鋪﹐專賣火柴。裡面有好多唔同設計嘅火柴盒﹐仲有劉德華﹐張學友﹐周杰倫等等明星火柴盒﹐如果係按照邊個賣得最多而判斷明星受歡迎程度嘅話﹐最受歡迎嘅應該係...賤兔!
南鑼鼓巷裡面嘅其中一個胡同﹐見有架單車咪「借」嚟影下囉! 唔該渣機個位朋友快D影﹐我怕比人當我係偷單車賊呀! 超驚!
如果「不到長城非好漢」﹐咁我仲未係一條好漢喇! 因為今次唔夠時間去! 不過我敢講句﹐無去過鳥巢又點算去過北京呀?! 更何況我真係有喺裡面行咗個圈喎!
August 8, 2009 – 麥兜響噹噹首映
去咗荃灣睇麥兜響噹噹嘅首映﹐
真係好好笑!
好中意睇一D輕輕鬆鬆嘅戲﹐
可以笑下又可以令到成個人放鬆一下!
特別中意麥太嗰隻有關更年期嘅歌﹐
聽完笑到我眼水都標埋﹐
比我搵到我實set做手機鈴聲!!!
August 10, 2009 –宣傳日
今日安排咗一連三個訪問﹐
首先係出銅鑼灣做Respect Magazine訪問﹐
對上一次至今大概都有一年喇﹐
今次唔同係因為有埋阿Hom一齊做訪問。
佢依然一如以往貫徹住佢怕醜仔嘅性格﹐
成個訪問都唔多出聲﹐
大部份都係我講。
應該下一期就會出架喇!
做完訪問就即刻趕入TVB錄都市閒情﹐
perform我最新派台歌喇!
之前嘅entry都講過﹐
今次派台歌會係一隻翻唱歌﹐
想知係乜歌﹐重新編曲又會有點樣嘅效果﹐
記住留意今個禮拜三嘅都市閒情喇﹐
因為係第一次表演架﹐
仲從未出過街添!!!
跟住再趕第三場﹐
從將軍澳飛的去中環IFC﹐
為之前文匯報嘅訪問補影返D相。
一直影慣單人相﹐
今次同埋阿Hom的確有D唔慣﹐
再加上阿Hom都無乜影相嘅經驗﹐
睇怕我哋兩個要再惡補一下喇!
希望登出嚟嘅相會靚仔啦!
哈哈...
遲D先再upload多D相比大家睇啦!
-
VoLiNo Trio Mini Show part 3@City Hall, Central
Tuesday, Aug 11, 2009 3:48PM / Standard Entry
VoLiNo Trio Mini Show part 3
Date & Time: Aug 27, 2009; 8:15pm
Location: City Hall, Central
Admission: $120 (Through URBTIX-Computerized Ticketing)
Enquiry: 2335 0802 Ms. ChoiHOPE TO SEE YOU THERE!!!
-
VoLiNo Trio Mini Show Part 2 @ Fringe Club
Saturday, Aug 1, 2009 5:42AM / Standard Entry
"The show must go on!"
...and it DID...
...for the 2nd time!好不容易﹐
完成咗part 1後﹐
擔心又興奮完﹐
心情總算平復落嚟﹐
開始為part 2作最後準備!
其實part 1同part 2相隔只有短短六日﹐
的確有D緊湊!
估唔到九號風球走咗﹐
會有個更大嘅災難即將發生!
又再度陷入要決定洗唔洗cancel個show嘅狀況!
開show前3日﹐
突然收到pianist嘅電話﹐
話炒咗單車。
幸好傷勢唔算太嚴重(thank God!)
不過應該唔能夠表演!
唯有即刻搵幫手﹐
希望有人可以臨時頂上啦!
第一時間祈禱交托比神﹐
但始終難免會有擔憂。
再者﹐要找琴手頂上本應唔難﹐
因為自入行以後發覺身邊認識好多極度talented嘅音樂人/琴手。
但問題就係﹐要配合彈古典樂曲﹐
仲要喺超短時間練成﹐的確係難上加難!
問完一個又一個都好似有唔同原因未能配合到咁﹐
好似每扇門都被關上咁!
最後﹐感謝神預備咗我嘅一位鋼琴老師朋友Michel﹐
所以個show總算可以繼續舉行!
不過﹐練習時間只能夠安排喺show前一晚﹐
但係有咁多首歌要練﹐點算呢﹖!
唔諗得咁多喇﹐唯有練到幾多得幾多﹐
盡力做啦!
卒之當晚去咗Michel屋企﹐
同佢一齊執番掂D譜同作最後衝刺。
一整就整都凌晨四點幾﹐
大家都總算可以暫時安心一D!
Show day,
卒之喺唔夠訓﹐又唔夠100%準備好嘅狀態之下﹐
頂硬上開show﹐
同自己講一定要盡全力﹐上到台就要專業!
可惜當時狀態如此差﹐
真係唔係單憑意志就可以overcome到﹐
上半場表現真係好失望﹐
自己都越唱越沮喪﹐覺得好frustrated!
Intermission後再上台﹐
真係再撐唔住﹐
只好將自己複雜嘅心情坦白對觀眾講﹐
跟大家道歉﹐
希望大家可以多多包涵!
然而﹐得到大家嘅支持同體諒﹐
真係感動到崩潰﹐眼淚再hold唔住!
抑壓咗咁耐嘅複雜心情一釋放之後﹐
個人立即鬆咗﹐奇跡出現喇﹐
下半場出乎意料地覺得自己表現尚算對觀眾有個交代﹐
大家都好似好enjoy!
實在太神奇﹐太感動喇!
多謝當晚入場嘅每一位朋友﹐
多謝你哋嘅支持同體諒!
我承諾我會繼續加油﹐
從挫折中成長﹐
期待將來能夠帶比大家更專業﹐更真更坦誠嘅演出!
「因我自己知道我為你們所定的計劃﹐是使你們得平安﹐而不是遭受災禍的計劃﹔要賜給你們美好的前程和盼望。這是耶和華的宣告。」
~ 耶利米書29章11節
-
VoLiNo Trio Mini Show Part 1 @ Backstage
Monday, Jul 20, 2009 1:52PM / Standard Entry
"The show must go on!"
...and it DID!Show前一晚好早就去訓﹐
準備養精蓄銳put on a good show!
一起身發覺原來個風嚟得好猛﹐
(雖然望出窗口又唔覺有咩動靜)
不過﹐心裡又確實隨住個天氣一樣﹐
打起風上嚟﹐好亂好不安!
甚至有D不忿點解要簡今日!
同時間﹐又不停安慰自己﹐
唔好諗太多﹐可能個風打唔成呢﹖
可能都會有人風雨不改嚟支持呢﹖
所以就開始自己心理建設﹐
激勵自己無論有幾多人嚟都要give一個最好最精彩嘅表演!
當然﹐講就易﹐做...的確有D難道!
不過襯仲有時間﹐
唯有令自己專注多一D﹐
就好好利用最後嘅一D時間嚟背熟DD歌詞罷啦!
大概下午三點﹐
見天氣都唔算太惡劣﹐
就即刻出門口準備四點到場地final rehearsal + sound check!
其實整日都不停有朋友sms嚟問究竟會有咩安排﹐
同公司傾都覺得﹐如果三號風球就照常﹐
八號先取消...
所以都唔理咁多﹐sound check,
食晚飯﹐上salon梳化...
十點左右就到達Backstage作最後準備﹐
亦開始調整自己嘅心情預備開show...
原定開show時間係十點半﹐
一開始見無乜人﹐
個心真係有down一down...
不過後來開始陸續有人到﹐
嗰一刻真係好感動﹐直情有D淚水想澭出嚟嘅感覺!
From the bottom of my heart﹐
多謝每一位朋友﹐
因為喺咁惡劣情況都依然冒住無車返屋企嘅危機到場支持我!
當然﹐到最終﹐我加小提琴家阿Hom同幫我哋鋼琴伴奏嘅阿曦都落力演出﹐
到場嘅觀眾睇落都幾enjoy我哋個show!
Well, 都係唔講太多喇﹐
自己睇相啦!
錯過咗嘅朋友﹐千其唔好再錯過part 2 @ Fringe Club,
同埋 part 3 @大會堂演奏廳喇!!!
三個show都係唔同rundown﹐有唔同曲目架!!
下星期五﹐24號晚Fringe Club見!
特別鳴謝﹕
多謝當晚有到場嘅記者朋友﹐辛苦晒!
多謝Backstage嘅每一位當值嘅朋友(especially Abe)﹐多謝你哋熱情嘅招待同一切安排!
多謝每一位勞苦功高嘅同事們﹐you are all fantastic team players!
多謝各到場支持嘅支持者及artiste朋友們﹐I just cannot thank all of you enough, you are all very special to me and I LOVE YOU ALL!!!
-
BLOG: 7月14日
Tuesday, Jul 14, 2009 7:14AM / Standard Entry
早前為Roadshow客串主持咗兩集飲食節目﹐
簡直啱晒我喱個為食仔啦!
到咗一間位於柴灣嘅酒家介紹佢哋嘅菜式﹐
特別係佢哋嘅湯水﹐
因為據經理所講﹐喱間係一間老火湯專門店嚟架!
當然﹐想知道我試過D咩湯水﹐咩菜式就自己搭巴士睇下啦!
不過﹐千其唔好以為我淨係掛住食呀﹐
作為一個主持新仔我都有做足功課架!
今次只不過係細佬第二次做主持﹐
(第一次係過年時介紹盤菜)
知道自己口才不嬲唔算太好﹐
所以拍攝前一晚收到份稿就起勢咁背喇!
拍攝過程都尚算順利﹐
多得導演周不時會講下笑﹐
所以大家都可以輕輕鬆鬆咁拍﹐
令我喱個主持新丁都唔覺得緊張。
不過今次嘅經驗另我重新appreciate每一飲食節目嘅主持﹐
因為我發覺﹐
當你要試食嘅時候﹐
要顧食相之餘﹐又要真心呈現出食物有幾好味﹐
最後仲要用言語形容出嚟﹐
嗰一刻先realize自己有幾詞窮!
睇怕真係要再喺喱方面再鑽研一下﹐
增加自己嘅詞彙喇!
備註﹕節目今日已經出咗街﹐記今日搭巴士記得留意呀!)
對稿中...
試食ing...~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
近排都有唔少朋友關心我幾時會有新派台歌﹐
可以透露嘅就係…就快喇!!!
有留意開細佬動向嘅朋友應該會知道﹐
細佬早前到過台灣錄歌﹐
再配合而家準備得正如火如荼嘅VoLiNo Trio Mini Show﹐
所以嚟緊大家將會聽到細佬派台嘅作品都走唔甩會係一D重新編曲嘅翻唱作品﹐
而編曲會係比較classical嘅style﹐用鋼琴同小提琴伴奏。
雖然我自己唱嘅部份早前已經喺台灣錄起咗﹐
不過我都好希望可以見證多D自己個BB整個孕育過程﹐
所以當我兩位拍檔﹐小提琴家Hom同鋼琴家(兼編曲)Philia﹐
上Avon Studio錄音時﹐我都特登走上去探班。
而家所有樂器同人聲都已經錄起喇﹐
現正後期製作當中﹐
好期待作品面世嘅日子!
In the meanwhile, 如果等唔切我嘅作品面世﹐
大家不妨嚟睇我即將舉行嘅VoLiNo Trio Mini Show part 1 and part 2呀!
Hom on his violin
合照 with Philia and Hom
