-
Tuesday, Jun 30, 2009 3:11AM / Members only
太容易相信人其實係好定係唔好呢? 我嘅思想好簡單架咋, 只想攞個心出嚟交朋友, 所以從來無懷疑過身邊嘅人會呃自己, 但係當知道原來自己一路都係比人呃緊嘅時候, 真係好難受, 我係咪應該改變一吓對人嘅方式呢, 我係咪再應該保護自己多D呢, 過往果10年我就係太保護自己所以無咩新朋友, 而家對朋友開始有返信任嘅時候, 點知就比人呃, 不過可能我真係太認真啦, 如果我可以佢哋咁咩都玩玩吓咁幾好呢, 但係我真係可以做得到咩.......
Add a comment
-
Sunday, Jun 7, 2009 5:34PM / Members only
已收拾傷感心情, 過返一D開心嘅生活, 令我咁快回覆到愉快嘅心情可能係我選擇咗讀書, 我而家已經返緊學啦, 雖然我咁多年都係做會計, 但係我一張會計證書都無, 其實考返張專業會計證書係我一路以嚟想做嘅事, 但係咁多年以嚟D工作都唔就時間去讀, 而家辭咗職反而係件好事, 可以令我專心一意去做自己想做嘅事, 同埋我又可以專心D溫習, 因為始終放低咗本書咁多年一定有好多嘢要溫返, 多D時間係會好D嘅, 2009年6月4日係我上嘅第一課原來真係唔係我想像中咁簡單, 真係溫書溫到傻, 讀商科果時都未試過咁溫書呀, 由其是係會計呀, 我從來都覺得係唔需要溫嘅一科, 可能今次真係唔想衰啦, 所以而家我開始有D壓力啦, 唔知係咪因為有壓力嘅原因, 我呢幾日好似好想食嘢, 食極都唔飽, 我會唔會未到考試就變咗大肥婆架, 哈~哈~都係唔好諗自己會唔會變做肥婆啦, 不如諗吓自己點樣先可以考好個試啦, 不過我屋企都仲未知我返學, 因為我果次同我阿媽提過我想讀書, 佢好似唔係幾讚成仲要喺到冷言冷語, 咁倒不如我唔話比佢哋聽我去返學, 由得佢以為我出去做嘢算啦!
Add a comment
-
Tuesday, Jun 2, 2009 4:33AM / Members only
"傳說世間每個人也會有一位天使護蔭!" 以前我都相信每人都有位守諼天使, 但係眼睇住自己身邊嘅人一個一個咁離開自己, 所以令到我而家已經唔想再相信有"守護天使"啦, 呢兩日個心情真係好沈重, 回憶返好多嘢, 就當做送別我呢個好朋友啦, 隨住所有儀式完結, 佢喺呢個世界上亦都完結, 過埋今晚我亦都唔會再唔開心, 因為我喺你心目中係好鐘意笑嘅, 我知道你見到我喊你都會喊, 其實我真係唔明一個心哋咁善良嘅人個生命點會咁短暫, 如果呢個世界真係有守護天使嘅話, 你可以唔使守護我, 但係你一定要守護我嘅家人, 朋友, 同埋我所愛嘅人, 我知道身邊嘅朋友有好多煩惱, 亦知道佢哋有D係好多心事搞到自己好唔開心, 亦有D因為過去咗嘅人佢哋係放唔低又搞到自己好唔開心, 我希望你能護蔭我身邊所有人都開開心心, 快快樂樂, 健健康康,唔會再有煩惱!
Add a comment
-
Thursday, May 28, 2009 1:23AM / Members only
我相信以後我寫嘅blog唔會再有你呢個讀者啦, 最唔想發生嘅事今日终於都發生了, 關係要完結啦, 眼淚已唔受控制咁流出嚟, 好耐都無痛快地喊一埸啦, 以前一個人住, 可以點喊就點喊, 但係而家連避難所都無埋, 我只好收埋自己嚟喊, 好討厭自己明知輸唔起, 根本一開始就唔應該參與, 仲有好憎自己D眼淚可唔可以唔再流呀, 我已經好努力好努力咁叫自己唔好再流眼淚, 佢偏偏唔聽話........原來真係連個天都唔鐘意我, 點解次次喺我最開心嘅時候你就要攞走哂我D開心, 如果可以從頭嚟過我寧願咩都無發生過, 因為真係會好心痛! 我而家連睇返之前寫關於你果Ｄ嘢我都無勇氣, 自信心去咗邊我亦都唔知啦, 如果話人生如戲, 我諗我應該係一套悲劇............一日裹面受兩個打擊, 我都想我嘅故事係喜劇都唔得啦.
Add a comment
-
Wednesday, May 20, 2009 3:22AM / Members only
開心雖然唔使用錢買嘅, 但係原來開心係要借返嚟架, 每當開心過後就會接二連三嘅唔開心架啦, 所以我寧願做一個平平凡凡嘅人, 有好多朋友都講處女座嘅人第三感係好勁, 其實我從來都唔信星座呢樣嘢, 但係有時唔到你唔信, 因為每逢一有事發生之前, 我都會感覺到一D不安嘅感覺, 每次我一有呢種感覺就會特別留意身邊嘅人每一句說話每一個小動作, 因為我好想知道將會有D咩事發生, 究竟係屋企吖定係感情吖, 等我有個心理準備, 又可能處女座嘅人係一個非常細心的人, 每次我都會留意到將會有咩事發生, 而每一次我都希望自己估錯, 但係次次都準到不得了, 過澳門又唔見自己咁叻, 雖然話做好心理準備但係事情要發生嘅時候都會好傷, 由尋晚開始不安嘅感覺又再出現, 初時我都會問自己係唔係呢排無工返諗多咗嘢呢, 答案我諗唔係, 因為由尋晚開始我諗我知發生咩事了.......到咗今晚已經仲明顯了.....
Add a comment
